عيل في ال30 --اسكتشات

مقدمة

الاسم: آدم.

السن:  29/ 11/ 29أو 29 سنة و11 شهر و29 يوم.

الحالة الاجتماعية: أعزب.

الديانة: مسلم.

الجنسية: مصري.

الآراء السياسية: ليبرالي .

المهنة: موظف.

يتلخص عمر الإنسان بين ورقتين: بطاقة للميلاد وبطاقة للوفاة. يُذكر بهما المعلومات الأساسية لكل فرد. والتي تتلخص في اسمه وجنسيته وديانته. وتُختزَن بطاقات تعريفه ومؤهلاته وصراعاته في أرشيف الذكريات. فإذا أردت أن يتذكرك التاريخ بعد وفاتك، فعليك بنصيحة "بنجامين فرانكلين"؛ إما أن تكتب شيئا يستحق القراءة، أو أن تفعل شيئا يستحق الكتابة. ومن هنا قررت -وأنا على مشارف الثلاثين- أن أقدم كشف حساب لذاتي. أفترش ذكرياتي، وأتلصص على حياتي، لعلي أقف على حقيقتي وشخصيتي.

قد أستطيع تغيير تاريخي، أو أساعد من يشبهني لرؤية حقيقته ‘‘لازم يكون فيه لحظة صدق في حياتنا، حتى لو الصدق ده محدش هيعرفه عنك غير نفسك.. فيا رب أوْصل للصدق مع نفسي’’

تحياتي. عيل فى الـ.30

1

حواء

خلقت حواء من ضلع آدم الأيسر. ذلك الضلع الذي يحمي القلب، الذي خلقت منه وهو نائم حتى لا يكره آلامه، فيكرهها. وعند هبوطهما الأرض ظلت حواء مواصلة الليل بالنهار بلا راحة؛ بحثًا عن آدم. أما آدم فكان يبحث عنها نهارًا ويخلد للنوم ليلا.

فحواء هي رمز الصبر والاحتواء. فرغم معاناتها، تعطف.. ورغم حزنها، تسعد..

ومن هنا قررت أن أبدأ مذكراتي بحواء، أو بمعنى أدق: قيمة حواء. فمثلي مثل أي رجل ‘‘حواء هية أهم حاجة عندنا’’.. حواء عند الرجل تعدت كونها امرأة. ‘‘حواء عندنا قيمة’’
وقيمة البحث عن حواء هي أكبر قيمة في حياة أي ذكر.. ‘‘وممكن تكون هي شغله الشاغل. من ساعة ما العيل يبدأ يِطْول شويه، وصوته يغلظ، ويطلعله شنب في وشه؛ همه الوحيد إنه يلاقي حواء.. أو تعجب بيه أي حواء في الطريق.. معرفش ليه حواء قيمة عزيزة عندنا كده؟! أو ممكن تكون غريزة.. المهم إن الشاب ممكن يعيش حياته كلها يدور عليها، وأحيانا ممكن يلاقيها في طريقه..

قيمة حواء عند الراجل بتختلف زي نظرته ليها بالظبط. فيه راجل نظرته ليها دونية، حاسس إنها موجودة عشان تخدمه وبس.. أو إنها مصدر للمتعة، مش أكتر من كائن جنسي. وحواء عندي هية كل الحياة، ووجودها في حياتي أهم من وجود حاجات كتير. أهم حتى من الأكل والشرب!

حواء هية الإنسانة اللي تفهمني من غير ما اتكلم. حواء هية اللي تقدر تحتويني.. وتحترمني.. وباحساسها الصادق تخترقني.. همي همها، وفرحي فرحها. حواء هي أمي.. وحبيبتي اللي بدور عليها. واللي لما لقيتها ضيعتها!’’

2

الخوف

اعترف بخوفك. الخوف هو أحد الأحاسيس الطبيعية التي تمر بالبشر. ومن الممكن أن يكون الخوف نافعًا إذا جاء ملائمًا للموقف الذي أدى إليه. فهو ينبهنا لحدوث خطر ما. لذا تعتبر أول خطوة للتخلص منه هو تقبله والاعتراف به. ‘‘ناس كتير بتتهمني إني جبان.. إني بخاف وبهرب من أي مشكلة.. بس مش دي الحقيقة. ازاي أخاف وأنا برج الأسد؟! ومن أهم صفاتي الإقدام والجرأة. طبعا هتقولولي سيبك من الأبراج!

ماشي. هسيبني من الأبراج..

في الحقيقة أنا فعلا بخاف. بخاف على شكلي في عيون الناس.. بخاف أغلط.. بخاف على أهلي وأصحابي.. أخاف عليهم وعلي شكلهم..

عشان كده تلاقيني خايف أواجههم باللي حاسس بيه.. ممكن يزعلوا، أو تنقص نظرتهم ليا. ازاي -وأنا اللي بحاول أكون مثالي قدامهم- أغلط، أو تكون ليا هفوات؟!

حتى إحساسي وتظاهري بالمثالية؛ ده خوف. خوف على شكلي قدام نفسي أو على شكلي قدامهم.

يا ترى ممكن يكون الخوف طبيعة جوانا؟ ولا احنا اكتسبناه؟ زمان لما كنت بخاف كنت بجري واستخبى في حضن أمي. وكانت بتحاول تقويني بأي كلام.

ولما كنت بغلط كنت بجري استخبى وانا خايف من العقاب. كنا بنلجأ للكدب أحيانا عشان نداري خوفنا

لكن في الحقيقة الخوف بقى في كل شيء في حياتنا. حتى في علاقتنا بالناس، بقينا نخاف مين اللي الصادق ومين الكداب! مين الأمين ومين الخاين!’’

3

الغضب

‘‘الغضب هو أكتر حاجة بتبين شخصية الإنسان. والغضب بيحصل لما تتجرح.. لما حد يمس كرامتك، أو يضايقك.

ولكل إنسان رد فعل في الغضب. منهم اللي بيصرخ. أو اللي يكسر أي حاجة يشوفها قدامه. أو يهلفط بكلام ملوش لازمة، ممكن يرجع يندم عليه بعد كده.

لكن الغضب عندي أصعب بكتير’’.

فمن الصعب أن تغضب. لكن من الأصعب أن تكتم غضبك.

‘‘فكتمان الغضب ده بيقتل الإنسان. بيقتلني..

لكني اتعودت إني كل ما اغضب أسكت.

ناس بتقول إني قماص.. لكن الحقيقة إن الصمت ده فن من فنون الغضب الراقي. بجد.. ما هو الغضب ده إما يرميك في الزبالة ويطلعك حثالة.. أو انه يرتقي بيك، ويكبرك، ويخليك تعرف تاخد حقك بعد كده’’.

الغضب إما أن يلقي بك في مزبلة الحياة، أو يرقيك لتكن إنسانا!.

‘‘فانت لما تسكت هتبين قد إيه اللي قدامك حقير. ومهما تكون غلطت، هو هيحس إنه غلط في حقك.. فلازم ييجي يصالحك. وده أسلوب قليل من الناس اللي يقدر يتحمله، أو يتعامل بيه. ده الصمت ده ميعرفوش غير الإنسان اللي بيحب يحافظ علي شياكته ولباقته. بعترف إن الصمت ممكن يكون خسرني كتير. على الأقل كان جوايا كلام كتير نفسي أقوله، ومقولتوش لناس متستاهلش. وصحيح إن الصمت ده بيوجعني قوي، لكن أنا لازم أكون وشخصيتي قماص بمثالية’’.

الصمت كرامة.

4

التحدي

ها أنا أفعل وسوف أفعل!!!

هذه ليست خطبة من خطب الرئيس محمد مرسي، ولكنه التحدي.

‘‘التحدي في إني أوصل للشيء اللي أنا عايزه.. أو الشيء الصعب اللي ممكن يستصعبه غيري.

بحب التحدي ده حقيقي.

ممكن يكون صفة طفولية كبرت معايا.. وممكن أكون زي باقي الرجالة بيحب الشيء الصعب. التحدي بقى في كل شيء. في الشغل لما انجز شغل كتير في وقت قياسي..

أو إني أوقع بنت عجباني.

أو إني أتحدى نفسي في إني أبعد عن حد بحبه.

التحدي بالنسبة لية لعبة بحب العبها كل يوم، وممكن كل دقيقة. ممكن يكون ده شكل من أشكال إثبات الذات.

من كتر حبي في التحدي بحب الرياضة. فطبعا بحب اتفرج علي الكورة. وبحب نظره التحدي اللي في لاعبي المصارعة الحرة.

أقدر أقول إني مقامر ماهر.. بس مش بقامر بالفلوس والعياذ بالله! لأ. بقامر بأفعالي.. أراهن نفسي إن اللي أنا عايزه هيتحقق.

وبالفعل يتحقق.

واجري واقول لنفسي:

"ها أنا قد فعلتها"’’.

5

التدين

‘‘الدين هوة العقيدة. هو الحرية. ربنا جعلها باختيارنا فقال {فمن شاء فليؤمن ومن شاء فليكفر} لكن في بلادنا الدين وجهة اجتماعية.. ستار نتخفى وراه!

ناس كتير قوي بتقول إنها بتعرف ربنا، لكنها للأسف متعرفش أبجديات الدين!

علمونا زمان الدين معاملة. والمعاملة عندهم تقف لحد مصالخهم! ايوة مصالحهم همة بس!

وفي الآخر تلاقيه بيحاسبك. وبيكفرك أحيانا لأنك مبتصليش. أو لمجرد انك مختلف معاه في الرأي.

مع إنك ممكن تلاقيه بيرتشي وهو خارج من الوضوء ورايح يصلي!

دايمًا (المستشيخيين) دول بيعتبروا أي حد غيرهم كافر، أو في درجة أقل منهم، وعليهم إنهم ينصحوه.

طب ما تنصحوا نفسكم وتبطلوا. أو على الأقل تحاولوا تبطلوا تغلطوا.

اقرءوا شوية في دينكم بشكل سليم، واعرفوا إن ربنا هو اللي بيحاسب، وإن ربنا هو اللي مطلع وعارف قلب كل إنسان فيه إيه.

وإن ممكن في لحظه تموت على كفر، لو ربنا أراد ده. وان اللي انت بتقول عليه كافر يموت علي طاعة ويدخل الجنة.. فسيب الحساب لله وحاول تبقي كويس.

والدين بالنسبة لية شيء كبير قوي. ممكن أكون مش مواظب شوية في الصلاة، بس بصوم رمضان، وبزكي في السر والعلن، وبخاف من ربنا، مع إني بغلط.. وأيوة أنا ساعات بربي دقني، بس لانها حلوة علية.

بس على يقين إن ربنا هيغفر لي مهما أخطأت’’.